AGADER
CONCÉDELLE O III PREMIO AO EMBELECEMENTO DO MEDIO RURAL GALEGO AO
PROXECTO HIFAS DA TERRA, DE PONTEVEDRA
O
Premio Agader ao embelecemento do medio rural outorgouse na súa edición
do 2005 ao proxecto denominado Hifas da Terra, pola conservación do
patrimonio e a súa integración na cadea produtiva así como pola posta
en valor dun contorno natural, mediante a obtención de produtos
diversificados da actividade fundada no sector primario. A candidatura presentada por Hifas da Terra consiste na instalación, nunha quinta construída no ano 1737, dunha empresa de biotecnoloxía dedicada principalmente á produción ecolóxica e ao envasado de cogomelos, formación neste eido, así como servizos forestais e restauración arbórea. O proxecto empresarial desenvolveuse con respecto pola construción e polo contorno, co aproveitamento das antigas edificacións de uso agrario para acoller, coas transformacións necesarias, dende modernas salas de envasado e tratamento dos cogomelos ata un laboratorio. ------------- O
xurado recoñeceu tamén que as accións no ámbito rural cobran un
especial interese cando conseguen implicar os veciños mediante o traballo
voluntario, polo que acordou conceder un accésit, polo esforzo
dinamizador do tecido social co obxectivo da recuperación do patrimonio
mediante a participación cidadá e o traballo voluntario, á candidatura
Proxecto Esmelle presentado pola Asociación de Veciños "Valle de
Esmelle" de Ferrol. O
Proxecto Esmelle é unha iniciativa que pretende impulsar a recuperación
do patrimonio histórico, etnográfico e cultural da zona mediante a
concienciación dos propietarios dos distintos elementos e dos veciños en
xeral, coa proposta dunha serie de actuacións e o establecemento dunhas
liñas básicas a seguir. Desenvolvéronse diversas actuacións: xuntanzas
veciñais, sinalizacións, encontros, xornadas de limpeza voluntaria,
romarías castrexas e diversos estudos das actuacións programadas. O
maior valor e interese da actuación corresponde á mobilización dos veciños
e á dinamización social, a través da que teñen realizadas diversos
programas con traballo voluntario. -------------- O
xurado estableceu criterios para a valoración das candidaturas
presentadas que serven para exemplificar actuacións sobranceiras que
incidan na posta en valor do medio rural. Apreciáronse nas actuacións
tanto a conservación do contorno natural, como a defensa do patrimonio
cultural, histórico ou artístico, ademais da realización de obras ou
accións comunais como manifestacións de solidariedade extraordinaria. A
acta do xurado recolle o obxectivo de incidir na vontade de mantemento do
patrimonio construído, coa advertencia de que "o campo é un
contorno vivo se se produce nel e pode así mesmo compatibilizarse a
produción anovadora co mantemento e integración na cadea produtiva dos
edificios de valor senlleiro e dos espazos e contornos naturais". O
xurado estivo presidido polo director da Axencia Galega de Desenvolvemento
Rural, Edelmiro López Iglesias, e contou coa participación da directora
xeral de Fomento e Calidade da Vivenda, Encarna Otero, do director xeral
de Conservación da Natureza, Xosé Benito Reza, do director da Escola
Politécnica Superior-Campus de Lugo, Xoán Carreira, do vicerreitor de
Infraestruturas e Xestión Ambiental da Universidade da Coruña, Xosé
Lois Martínez Suárez, e da secretaria da Asociación de Artesáns de
Mondoñedo, Elena Candín, en representación da entidade gañadora do
premio ao embelecemento do medio rural galego na anterior edición. |
